Go to ...

टटका खबर

Online Bhojpuri Newspaper

RSS Feed

टटका खबर, शुक, २६ नवम्बर


नीतीश के शपथ ग्रहण समारोह
आजु उपरि बेरा पटना के गाँधी मैदान में राज्यपाल देवानंद कुंवर नीतीश कुमार के बिहार के 32वां मुख्यमंत्री का रूप में अउर भाजपा के सुशील कुमार मोदी के उपमुख्यमंत्री के रूप में पद आ गोपनीयता के शपथ दिअवलें. साथ ही साथ जदयू के 18 आ भाजपा के 10 विधायकन के मंत्री पद के शपथ दिआवल गइल. जदयू का तरफ से विजय कुमार चौधरी, बिजेंद्र प्रसाद यादव, नरेंद्र सिंह, रमई राम, हरि प्रसाद साह, भीम सिंह, रेणू कुमारी, जीतन राम मांझी, दामोदर राउत, पूर्व महाधिवक्ता पीके शाही, शाहिद अली खान, श्याम रजक, प्रवीण अमानुल्लाह, नीतीश मिश्र, अवधेश प्रसाद कुशवाहा, आ गौतम सिंह रहलें जबकि भाजपा का ओर से नंद किशोर यादव, चंद्रमोहन राय, अश्विनी कुमार चौबे, जनार्दन सिंह सिग्रीवाल, गिरीराज सिंह, सत्यनारायण आर्य, रामाधार सिंह, सुखदा पांडेय, आ सुनील कुमार उर्फ पिंटू रहलें. विभाग के बँटवारा अबहीं नइखे भइल.

नीतीश के ताजपोशी आजु
तिसरका बेर बिहार के मुख्यमंत्री बने जा रहल नीतीश कुमार आजु पटना के गाँधी मैदान में मुख्यमंत्री पद के शपथ लीहें. साथही में सुशील मोदी के उपमुख्यमंत्री के शपथ दिआवल जाई. २५ गो कैबिनेटो मंत्री बनावल जइहें जवना में १५ गो जदयू से आ १० गो भाजपा से रहीहें. एहसे पहिले राजग के संयुक्त विधायक दल का बइठक में नीतीश के नेता चुनल गइल. नीतीश विधायक लोग से कहलें कि जीत में अगरइला के जरुरत नइखे ना ही प्रतिपक्ष के मजाक उड़ावे के. जनता काम करे खातिर चुनले बिया आ काम में लाग जाये के जरुरत बा.

मुंबई हमला के दुसरका बरखी आजु
मुंबई हमला के दुसरका बरखी आजु पूरा देश में मनावल जा रहल बा. जगहे जगह कार्यक्रम करावल जा रहल बा. मुंबई में सुरक्षा बल के परेड निकालल गइल. बाकिर एह हमला के अकेला जिन्दा बाँचल अपराधी कसाब आजु ले सरकार के दामाद बनल बा. सगरी दुनिया देखलसि बाकिर हमरा देश के न्यायप्रणाली देखावा में विश्वास करेले से आजु ले कसाब के सजा ना दिआवल जा सकल. ओह पुलिस वालन के अफसोस होत होखी कि मार काहे ना दिहली जा एह आदमी के जे आजु ले जिन्दा बा. आ पता ना अगर कोर्ट से सजा मिलियो गइल त कबले ओकरा के सजा दिहल जाई. संसद पर हमला के दोषी अफजाल के सजा सुप्रीम कोर्ट तक बहाल रहल बाकिर कांग्रेस सरकार ओकरा पर आजु ले फैसला ना ले सकल. हँ ओकरा के बचावे का चुप्पा कोशिश में धीरे धीरे फाँसी के सजा पावल हर आदमी के राष्ट्रपति माफ करत जात बाड़ी.

नारायणपुर में दु आदमी के गोली मार के हत्या
पुर्वी चंपारण के राजेपुर थाना के नारायणपुर गाँव में नक्सली काल्हु दू आदमी के गोली मार के हत्या कर दिहलें. मौका ए वारदात पर मिलल परचा में ओह लोग के पुलिस के मुखबिर बतावल गइल बा. एगो दोसरा घटना में ओरंगाबाद जिला के नवीनगर थाना के सुदार गाँव में थर्मल पावर परियोजना में काम करे वाला कर्मचारियन का शिविर पर हमला कर के सात गो गाड़ी आ मशीनन के नुकसान चहुँपावल गइल. मौका पर मौजूद सुरक्षा कर्मचारियन के पिटाई कइल गइल. हमलावर नक्सली गिरोह के रहलें सँ.

अयोध्या फैसला का खिलाफ इलाहाबाद हाई कोर्ट में अरजी
अयोध्या के मालिकाना विवाद में आइल फैसला का खिलाफ इलाहाबाद उच्च न्यायालय में दू गो अरजी दाखिल कइल गइल बा. अरजी डा॰ मो॰ इस्माइल फारुखी दाखिल कइले बाड़न. कहले बाड़न कि निर्मोही अखाड़ा के मुकदमा पेश करे के अधिकारे ना रहल काहे कि ओकरा मुकदमा के फैजाबाद का अदालत में खारिज कर दिहल गइल रहे. पुरनका न्यायाधीश धर्मवीर शर्मा के रिटायर हो गइला का चलते न्यायमुर्ति के के दीक्षित के उनुका जगहा पर राखल गइल बा. कोर्ट एह अरजियन पर दस दिसम्बर के सुनवाई करी.

लालू प्रसाद अब यादवनो के नेता नइखन रहि गइल
जे हारेला ओकरा पाछा राजनीति में केहू ना रहि जाव. लालू प्रसाद आ रामविलास पासवान का साथे अब इहे हो रहल बा. लालू के पार्टी के शकुनी चौधरी, जे विधानसभा के उपाध्यक्ष रहलें आ मुंगेर का तारापुर से चुनाव लड़ के हार गइलें, कहले बाड़न कि लालू के पार्टी अध्यक्ष पद से इस्तीफा दे देबे के चाहीं, काहे कि अब ऊ पार्टी के के कहो यादवनो के नेता नइखन रहि गइल. दोसरा तरफ रघुवंश प्रसाद सिंह कहले बाड़न कि पार्टी के हार लोजपा से गठबन्हन का चलते भइल जेकरा के औकात से फालतू सीट दे दिहल गइल रहे. ओने काल्हु रामविलास पासवान हवाई जहाज से दिल्ली चल गइलन. एयरपोर्ट पर उनकर विदाई करे वालन के कवनो भीड़ ना रहे. पार्टी के हार से बेसी अपना दू गो भाई आ दू गो दामाद के हार से दुखी रामविलास पासवान चुपचाप जहाज में चढ़ गइलन.

संपर्क क्रान्ति पटरी से उतरल
काल्हु अधरतिया का बाद करीब सवा दू बजे रात में पटना का लगे दीदारगंज में गौहाटी नयी दिल्ली संपर्क क्रांति एक्सप्रेस, २५०१ अप, के चार गो बोगी पटरी से उतरि गइलीं सँ. संजोग बढ़िया रहे कि केहू घवाहिल नइखे भइल. बाद में चारो बोगी के छोड़ के बाकी ट्रेन के पटना जंक्शन ले आइल गइल. जहाँ तीन गो नया बोगी जोड़ के ओह लोग के आगा पठावल गइल.

भोजपुर एस पी का खिलाफ वारंट निकालल गइल.
पटना हाई कोर्ट भोजपुर के एस पी अनिल किशोर यादव का खिलाफ गिरफ्तारी वारंट जारी कर दिहलसि काहे कि एगो फौजदारी मुकदमा में निचला अदालत में गवाहन के हाजिर ना करवलन. एगो आरोपी शिवरतन यादव हाई कोर्ट में जमानत याचिका दाखिल कइले बा कि ओकरा सुनवाई में गवाहन के हाजिर ना भइला का चलते ओकर मामिला के सुनवाई में देरी भइल. एह पर कोर्ट एसपी के हलफनामा दायर करे के कहले रहुवे कि बतावसु कि काहे देरी भइल. बाकिर जब एसपी ना अइलें त कोर्ट उनका खिलाफ गिरफ्तारी के जमानती वारंट जारी कर दिहलसि.

%d bloggers like this: