घोटाला के आरोप में पूर्व मंत्री ए॰ राजा के गिरफ्तारी

आजु बुध का दिने पूर्व केन्द्रीय संचार मंत्री ए॰ राजा के आ मंत्रालय के दू गो अधिकारियन के गिरफ्तार कर लिहल गइल. एह लोग पर टूजी स्पेक्ट्रम बाँटे में घोटाला करे के आरोप बा. अगिला हफ्ता सीबीआई एह मामिला में सर्वच्च न्यायालय के अपना प्रगति का बारे में जानकारी दीहि. शायद केन्द्रो सरकार चाहत बिया कि संसद के अगिला सत्र में विपक्ष के हंगामा शान्त करे में ई गिरफ्तारी सहायक हो पाई. बाकिर नीतीश कुमार दिल्ली में पत्रकारन से बतियावत साफ कर दिहले कि विपक्ष एह घोटाला के जेपीसी से जाँच करवावे पर अड़ल बा आ ई अब सरकार के जिम्मेदारी बा कि ऊ आपन जिद्द छोड़ के जेपीसी बनावे पर तइयार हो जाव. जयललिला एह गिरफ्तारी के दिखावा कहले बाड़ी. भाजपा के कहना बा कि अतने से काम ना चली.