नोएडा के जमीन अधिग्रहण मामिला

काल्हु इलाहाबाद हाई कोर्ट के मुख्य न्यायाधीश एफ आई रिबेलो का निर्देश पर नोएडा आ ग्रेटर नोएडा के जमीन अधिग्रहण के सगरी मामिला अब एके साथ कोर्ट के एगो बड़हन खण्डपीठ सुनवाई करी. अगिला सुनवाई सतरह अगस्त के कइल जाई. एह बीच किसान आ नोएडा विकास प्राधिकरण आपसी समझौता कर सकेला. कोर्ट का एह निर्देश का बाद उमेद बनल बा कि शायद एह मामिला में कवनो बीच के राह निकल पाई. एक तरफ किसान अपना जमीन के अधिग्रहण का खिलाफ मुकदमेबाजी में लागल बाड़े त दोसरा तरफ लाखो लोग के जिनिगी भर के जमा पूंजी डूबे के डर हो गइल बा. ओह इलाकन में बने वाला लाखो फ्लैट खातिर लोग आपन जमा पूंजी लगा चुकल बा आ अब सगरी निर्माण पर रोक का बाद लोग के आपन पूंजी डूबे के डर सतवले बा. सरकार किसान के समुझावे में लागल बिया कि ऊ लोग कुछ अधिक मुआविजा ले के मान जाव जवना से कि बिकास के काम बेरोकटोक चल सके.