मंत्री नेता भा अफसरान के परिजन के आवंटन कानूनी बा

बिहार के उपमुख्यमंत्री सुशील मोदी काल्हु कहले कि बियाडा जमीन घोटाला में बेमतलब आरोप लगावल जा रहल बा. एहिजा पुरान नियम आ परंपरा बा कि मंत्री, विधायक, आ कवनो अधिकारी के परिवार वाले अपना खातिर जमीन आंवटन खातिर आवेदन कर सकेले आ ओह लोग के जमीन आंवटित कइल जा सकेला. एहमें कहीं कवनो गड़बड़ी नइखे भइल काहे कि एह मामिला में कवनो विवेकाधीन कोटा हइये नइखे. सुशील मोदी विपक्षी नेता लोग के रिश्तेदारन के नाम बतावत कहले कि जवना नियम का तहत ओह लोग के जमीन आंवटीत भइल रहल ओही नियम का तहत अबकी के मंत्री विधायकन के रिश्तेदारन के आवंटित कइल गइल बा. अगर विपक्ष का लगे कवनो ठोस सुबूत बा त ओकरा के सार्वजनिक करे.

ठीक कहलऽ सुशील भाई, जमीन के एह तरह के घपला के घोटाला ना कहल जा सके काहे कि एह हम्माम में सगरी लोग लंगटे बा. लोग के आपन माढ़ा नइखे लउकत आ दोसरा के फूला पर हल्ला मचावल जा रहल बा. शायद एही चलते येदियुरप्पो का खिलाफ भाजपा कवनो कार्रवाई नइखे करत काहे कि उहो नियमे का अनुसार अपना परिवार वालन के जमीन दिहले बाड़े.