आखिर मानही के पड़ल अन्ना हजारे के शर्त

नई दिल्ली, 17 अगस्त (आईएएनएस). दिल्ली पुलिस के आखिरकार सामाजिक कार्यकर्ता अन्ना हजारे का सोझा झुकही के पड़ल. अभ दिल्ली पुलिस अन्ना हजारे के जयप्रकाश नारायण राष्ट्रीय उद्यान का बदले रामलीला मैदान में अनशन करे के अनुमति दे दिहले बिया. साथही ऊ एहू बाति पर तइयार हो गइल बिया कि अन्ना हजारे ओहिजा सात दिन ले अनशन कर सकेले आ एह अवधि के जरूरत पड़ला पर बढ़ावलो जा सकेला.

दिल्ली पुलिस के प्रवक्ता राजन भगत पत्रकारन से कहले कि, “जवना छह गो शर्त पर अन्ना हजारे पक्ष के एतराज रहल, ओहमें हमनी का छूट दे दिहनी. हमनी का सात दिन ले अनशन करे के इजाजत दिहले बानी जवना के बढ़ावलो जा सकेला.”

ऊ इहो कहलन कि रामलीला मैदान में अनशन के समर्थन में आवे वाला लोगन के संख्या आ गाड़ियन के संख्या पर कवनो पाबंदी ना रही.

मालूम होखे कि अन्ना हजारे दिल्ली पुलिस के सगरी शर्त माने से इंकार कर दिहले रहले आ पुलिस हर शर्त मनवावे पर अड़ल रहुवे. एही चलते मंगल का सबेरे अन्ना के टीम समेत ह हिरासत में ले लिहल गइल रहे. बाद में उनुका के गिरफ्तार करके सात दिन के न्यायिक हिरासत में तिहाड़ जेल भेज दिहल गइल रहे. अन्ना हजारे ओहिजो आपन अनशन जारी रखलन आ पूरा देश में अन्ना के समर्थन में आवाज उठे लागल जवना का बाद मंगले का रात अन्ना के रिहाई के आदेश दे दिहल गइल बाकिर अब अन्ना शर्त लगा दिहले कि जबले उनुका के बिना कवनो प्रतिबंध के अनशन करे ना दिहल जाई तबले ऊ तिहाड़ जेल से बाहर ना निकलिहे.

इंडो-एशियन न्यूज सर्विस