उत्तर प्रदेश के खबर

(मंगल, 20 दिसंबर)

  • प्रदेश के चार गो राज्य में बाँटे के प्रस्ताव केन्द्र सरकार कुछ सवाल उठावत फेर राज्य सरकार का लगे भेज दिहलसि. केन्द्र जानल चाहत बावे कि एह विभाजन के पूरा रूपरेखा का रही. सीमा का होखी, राजधानी कहवाँ बनी, कर्जा कइसे बँटाई आ अधिकारियन के बँटवारा कइसे होखी एह सब सवालन के जबाब राज्य सरकार से माँगल गइल बा.
  • प्रदेश में मतदाता सूची पुनरीक्षण के काम दू जनवरी से दू दिन खातिर फेर करावल जाई जेहसे कि पिछला अभियान में छूटल फटकल मतदाता आपन नाम सूची में दर्ज करवा लेसु.
  • राज्य भर में चलत शीतलहरी में अबहीं ले बासठ लोग मर चुकल बा. शीतलहरी का चलते सगरी स्कूल पच्चीस दिसम्बर ले बन्द करा दिहल गइल बा.
  • काकोरी काण्ड के महानायक पण्डित रामप्रसाद बिस्मिल, ठाकुर रौशन सिंह आ अशफाकुल्लाह खाँ के बलिदान दिवस पर सोमार का दिने राज्य भर में श्रद्धांजलि कार्यक्रम आयोजित भइल. एही दिने ठाकुर रौशन सिंह के नैनी जेल में, अशफाकु्लाह खाँ के फैजाबाद जेल में आ पण्डित रामप्रसाद बिस्मिल के गोरखपुर जेल में फाँसी दे दिहल गइल रहे.
  • पिछला हफ्ता बलिया के एगो होटल से पंजाब के सर्राफा व्यवसायी के सामान चोरी होखे के मामिला के पर्दाफाश अबहीं ले नइखे भइल जवना से व्यापारी वर्ग में नाराजगी बा. पहिले त चोरी के रपट लिखे के थाना तइयार ना भइल त स्थानीय विधायिका मंजू सिंह का कहला पर घटना के अगिला दिने रपट दर्ज भइल. छह दिन बितला का बादो मामिला के जाँच में कवनो प्रगति नइखे भइल. हालात अतना संदिग्ध बना दिहल गइल बा कि कवनो अधिकारी एह मुद्दा पर मुँह खोले के तईयार नइखे होत. एह चोरी में करीब बाइस लाख के सोना चाँदी आ नगदी चोरी होखे के शिकायत व्यापारी कइले बा.
  • चरण सिंह के जन्मदिन तेईस दिसम्बर के सपा किसान दिवस का तरह मनाई.