एक जमाना रहल जब जेपी जयंती पर उनुका गाँव में नेतवन के मेला लाग जात रहुवे बाकिर अब लोग भुलाए लागल बा जेपी के. इहाँ ले कि कवनो समाजवादी नेता के समय ना मिलल कि सिताबदियारा आ के जेपी के गाँव में उनका के याद कर लीत. हँ जेपी का नाम पर लखनऊ में कुछ कार्यक्रम जरूर कर लिहल गइल. सिताबदियारा के कार्यक्रम बिहार के भाजपा नेता चलवलें. बिहार भाजपा अध्यक्ष डा॰ सी॰पी॰ ठाकुर आ उपमुख्यमंत्री सुशील कुमार मोदी सिताबदियारा आ के जेपी के श्रद्धांजलि दिहलें. कहल लोग कि अगिला साल से एह दिन के जेपी महोत्सव का रूप में मनावल जाई.
