सपा सरकार के बड़ाई जन जन ले चहुँपावे का प्रोग्राम में निकलल सपा मंत्रियन के बदजुबानी के खबर से सपा के छवि अउरी खराब होखे लागल बा. राज्य के वस्त्र उद्योग मंत्री शिव कुमार बेरिया कहलें कि पुलिसवालन के औकात नइखे कि उनुका कहला बिना बइठिओ सकस्. जिन जाने उनकर बात ना मनीहें उनकर वरदी २४ घंटा का भितरे उतरवा लिहल जाई.
दुग्ध विकास मंत्री राममूर्ति वर्मा अपना भाषण में कहलन कि छोट मोट घटना त हमेशा होत रहल बा आ होत रही चाहे केहु के सरकार आवे.
पर्यटन मंत्री ओमप्रकाश सिंह कहलें कि राज्य के कानून व्यवस्था के हालत त ठीक बा बाकिर मीडिया के दिमाग खराब हो गइल बा.
अउर त अउर, सबले बढ़िया बयान आइल बा मुलायम सिंह के भाई राजपाल यादव के जे कह बइठले कि सरकार त बढ़िया काम करत बिया बाकिर पार्टी नेतृत्व सही फैसला नइखे ले पावत जवना चलते विरोधियन के मौका मिल जात बा सरकार पर अछरंग लगावे के.
अब सपा के कहना बा कि एह मंत्रियन के बयान के जाँच करावल जाई आ दोषी मिलला पर एह लोग पर कार्रवाई कइल जाई.
