Go to ...

टटका खबर

Online Bhojpuri Newspaper

RSS Feed

महाराजगंज उपचुनाव के प्रचार आजु थथम जाई


महाराजगंज लोकसभा सीट पर होखे वाला चुनाव ला प्रचार आजु साँझ पाँच बजे से थथम जाई. एके साल खातिर होखत एह चुनाव के नीतीश कुमार आ लालू प्रसाद के नाक के सवाल बना दिहल गइल बा. दुनु तरफ से जीत खातिर हर दाँव खेले के तइयारी बा. बीच में कांग्रेसो आपन पूरा जोर लगवले बिया बाजी मार ले जाए खातिर. दिवंगत नेता उमाशंकर सिंह के बेटा जितेन्द्र स्वामी कांग्रेस का टिकट पर लड़त बाड़न जबकि उमाशंकर सिंह राजद का और से सांसद रहलें. प्रभुनाथ सिंह राजद से पी के शाही जदयू का ओर से मैदान में बाड़ें. पाँच गो अउरियो उम्मीदवार मैदान में बाड़न बाकिर असल लड़ाई एही तीन जने का बीच बा. इलाका में राजपूत आ भूमिहार वोट निकहा बा. पी के शाही भूमिहार हउवन जबकि प्रभुनाथ सिंह आ जितेन्द्र स्वामी राजपुत.

वोट दू जून के होखे वाला बा. एह बीच सिवान जिला के तेरह जने जिलाबदर कर दिहल गइल बाड़ें आ पचीस जने के रोज थाना में हाजिरी लगावे के कहल गइल बा. जिलाबदर होखे वालन में मुस्तफाबाद के ध्रुव साह आ भीखर महतो, माधर के मनमोहन मिश्र, ख्वाबपुर के अयूब मियाँ, भोपतपुर के राजकुमार प्रसाद, डमछो के शिवाजी राय, पुरानी बाजार के गोपाल कुमार सोनी, पसनौली के विनोद कुमार सिंह आ राहुल सिंह, सागर सुल्तानपुर के कुरानुद्दीन, कौड़िया के शत्रुघ्न सिंह आ अखिलेश सिंह, अउर बगौछा के सुनील कुमार भेड़ा शामिल बाड़े.

Tags: ,

%d bloggers like this: