Go to ...

टटका खबर

Online Bhojpuri Newspaper

RSS Feed

मशरख के स्कूल में मिड डे मील से मरे वाला बचवन के गिनिती १६ हो गइल


मंगल के दुपहरिया सारण जिला के मशरख प्रखंड के धरमसती गंडामन गांव के प्राइमरी स्कूल में आइल बचवन के तबियत मिड डे मील में मिलल सब्जी भात खइला का बाद खराब होखे लागल. प्रभारी प्रधानाध्यापिका बतावत बाड़ी कि जवन लड़िका सब्जी खइले ओकनिए के तबियत खराब भइल. तुरते सगरी लड़िकन के प्राथमिक स्वास्थ्य केन्द्र ले जाइल गइल. ओहिजा दू गो लड़िकन के मौत हो गइल त बाकी सगरी बचवन के छपरा सदर अस्पताल भेज दिहल गइल.बाकिर ओहिजो लड़िकन के मरे के सिलसिला जारी रहल आ छपरा अस्पताल में चौदह गो लड़िकन के मौत हो गइल. देर रात में बाकी एकतीस गो बचवन के पटना अस्पताल भेज दिहल गइल. एहू में अनेके लड़िकन के तबियत बहुत खराब बा आ ओहिजो कुछ मौत हो सकेला.

जवन रसोइया खाना बनवले रहुवे ओकरो तबियत खाना खइला का बाद से बहुते खराब बा. डाक्टरन के कहना बा कि लागत बा कि खाना में कवनो जहर पड़ल रहुवे. हो सकेला कि कीटनाशन दवाई मिलल खाना बाँट दिहल गइल होखे.

एह घटना का विरोध में लोग छपरा के दारोगा राय चौल पर आगजनी कर के बड़ी देर ले हंगामा कइल आ पुलिसो से अझुरा गइल लोग. सरकार एह घटना के जाँच करे के आदेश दे दिहले बिया आ मृतक के परिवार के दू दू लाख रुपिया देबे के एलान कइले बिया. एह घटना का बाद राजनीति का मुताबिक आरोप के सिलसिला शुरू बा. भाजपा के कहना बा कि अइसन घटना का बाद मुख्यमंत्री के इस्तीफा दे देबे के चाहीं.

Tags: , ,

%d bloggers like this: