Go to ...
RSS Feed

बलिया समाचार, ३ फरवरी १४


  • विश्व भोजपुरी सम्मेलन के बलिया इकाई आ भोजपुरी दिशा बोध के चर्चित पत्रिका ‘पाती’ श्रीराम बिहार कालोनी में एगो काव्य संगोष्ठी आयोजित कइलसि जवना में भोजपुरी कवि आपन कविता पढ़ के सुनवले.
  • प्रदेश सरकार के कौशल विकास मिशन का तहत बलिया से पांच हजार अभ्यर्थियन के रोजगार करे जोग बनावे ला तकनीकी शिक्षा दीहल जाई, एकरा ला नाम दर्ज करावे के आखिरी तारीख 14 फरवरी तय भइल बा.
  • उत्तर प्रदेश टैक्स बार एसोसिएशन के गोहार प बलियो में वाणिज्य कर अधिवक्ता तीन दिन ले धरना दिहले आ वैट कानून के गड़बड़िअन का खिलाफ आठ सूत्री मांघ पत्र वाणिज्य कर कमिश्नर के भेजले.
  • पिछला दिने बैरिया इलाका के श्रीपालपुर में भइल दिलीप पासवान के हत्या के खुलासा करत पुलिस बतवले बिया कि दिलीप के हत्या नाजायज संबंध का चलते भइल. एह मामिला में पुलिस दू गो आरोपियन के गिरफ्तार कर लिहले बिया आ हत्या में इस्तेमाल छूरा आ कुदारी बरामद क लिहले बिया.
  • मुरली मनोहर टाउन स्नातकोत्तर महाविद्यालय के विद्यार्थी माँग कइले बाड़े कि बलिया में खुले वाला विश्वविद्यालय वीर लोरिक का नाम पर खूले. साथ ही जिला में मेडिकल कॉलेजो खोलवावे के माँग भइल बा.
  • भयंकर गलन वाला पाला से बलिया हफ्ता भर से परेशान बावे. उपर से बिजली संकट कोढ़ में खाज के काम करत बा. लोग कहत बा कि बिजली के अइसने हालत रहल त सपा सरकार यूपीमें जीते के सपना देखल छोड़ देव.
  • केन्द्रीय इस्पात मंत्री बेनी प्रसाद वर्मा कहत बाड़न कि यूपी में सात गो इस्पात कारखाना लगावल जाई. दू गो गोण्डा में लगावल जाई. एकरा अलावे रायबरेली में व्हील प्लांट आ जगदीशपुर अउर गोण्डा में पाँच पाँच सौ मेगावाट के बिजली घर लगावल जाई.

Tags:

More Stories From उत्तर प्रदेश

%d bloggers like this: