टटका खबर : 9 अक्टूबर 2014, बियफे

  • भोजपुर जिला के सिकरहटा इलाका के कुरमुरी गांव में पांच गो महादलित मेहरारूवन का साथे सामूहिक कुकुर्म करे के मामिला सामने आइल बा.
  • इलाहाबाद उच्च न्यायालय यूपी सरकार से पूछलसि कि वेलफेयर आफ पैरन्टस एंड सीनियर सिटीजन एक्ट 2007 लागू होखला का बादो एकर अधिसूचना राज्य में काहे जारी नइखे भइल.
  • भाजपा नेता सुशील कुमार मोदी कहलन कि साल भर का भितरे गांधी मैदान में भइल दू गो हादसा का बाद मैदान के विकास आ सुरक्षा वगैरह मुद्दा पर चरचा करे खातिर सर्वदलीय बइठक बोलावे बिहार सरकार.
  • बिहार के पश्चिम चंपारण जिला के रामनगर इलाका के सबुनी गांव का लगे एगो नवही के लाश सबेर में मिलल जवना का बाद खिसियाइल लोग अस्पताल में तोड़फोड़ कइल आ हाइवे जाम क दिहल.
  • यूपी पुलिस भरती बोर्ड का तरफ से दरोगा आ प्लाटून कमांडर बहाली खातिर लिहल परीक्षा के परिणाम घोषित कइलसि. परिणाम बोर्ड के वेबसाइट पर देखल जा सकेला.
  • जखनिया में लागे वाला मेला का चलते मऊ से वाराणसी का बीच एक जोड़ी स्पेशल ट्रेन चलावल जाई जवन मऊ से वाराणसी का बीच के सगरी टीसन पर रुकल करी. ट्रेन 15 अक्टूबर ले चलावल जाई.
  • 18वीं अन्त जनपदीय पुलिस खेलकूद प्रतियोगिता आजु से बलिया में शुरू हो गइल. बलिया के जिलाधिकारी यशवंत राव आ पुलिस अधीक्षक राजू बाबू एकर उद्घाटन कइलन. 11 तारीख ले चले वाला एह प्रतियोगिता में वाराणसी जोन के सगरी पुलिस आ महिला ठीम हिस्सा लीहें.
  • औरंगाबाद का सभा में शिक्षकन ला अपमानजनक, अनर्गल आ उकसावे वाला बयान देबे खातिर मुख्यमंत्री जीतन माँझी के निंदा करत माध्यमिक शिक्षक संघ बिहार में आंदोलन शुरू करे के चेतावनी दिहलसि.
  • सपा के सांसद रहल रामजी लाल सुमन सपा अधिवेशन में मुलायम सिंह यादव से माँग कइलन कि ठीक से काम ना करे वाला मंत्रियन के हटावल जाए.
  • चुनाव आचार संहिता लाँघे का मामिला में अदालत में हाजिर ना भइला का चलते पीलीभीत के एगो अदालत केन्द्रीय मंत्री कलराज मिश्र के खिलाफ गैर जमानती वारंट जारी कइलसि.
  • दक्षिण-पश्चिम मानसून उत्तर प्रदेश से पूरा तरह से विदा हो गइल बा बाकिर बंगाल के खाडी में बनत चक्रवात ‘हुदहुद’ का चलते सोमार का दिने पूर्वांचल में बरखा हो सकेला.
  • प्रधानमंत्री नरेन्द्र मोदी अगिला 14 तारीख के अपना संसदीय क्षेत्र वाराणसी के बनारस हिन्दू विश्वविद्यालय आयुर्विज्ञान संस्थान में ट्रामा सेन्टर के उद्घाटन करीहें. लोग ढेर दिन से एकरा ला तिकवत रहुवे.
  • जनेश्वर मिश्र पार्क में समाजवादी पार्टी के राष्ट्रीय अधिवेशन के आयोजन पर चिंता आ नाखुशी जतवलसि आजु इलाहाबाद उच्च न्यायालय के लखनऊ खंडपीठ बाकिर एह पर कवनो रोक लगावे से ना कर दिहलसि.
  • उत्तर प्रदेश के आजमगढ का जीयनपुर इलाका में काल्हु रात कुछ बदमाश गोली चला के एगो औरत के मार दिहले.

टटको में टटका आज के खबर पढ़ीं…..