टटका खबर : 25 अक्टूबर 2014, शनिचर

बिहार के मुख्यमंत्री जीतन राम माँझी भारत में वियतनाम के राजदूत का संगे.
बिहार के मुख्यमंत्री जीतन राम माँझी भारत में वियतनाम के राजदूत का संगे.
  • गड़बड़ी ना पसारे के चेतावनी देत उत्तर प्रदेश के मुख्यमंत्री अखिलेश यादव आजु राज्यमंत्री के दर्जा मिलल सगरी 80 गो मंत्रियन के बर्खास्त कर दिहलन. पिछला दिने यूपी सरकार के राज्य मंत्री दरजा मिलल एगो नेता के बाप बागपत में पुलिसवालन के हड़का के गोकशी का मामिला में दू गो अपराधियन के गिरफ्तार करे से रोक दिहले रहुवे. खबर मीडिया में अइला का बाद एह तरह के फैसला भइल बा.
  • भाजपा सांसद आ अभिनेता शत्रुघ्न सिन्हा कहलन कि बिहार विधानसभा चुनाव से पहिले भाजपा अपना मुख्यमंत्री पद के उम्मीदवार के नाम के एलान कर देव त फायदा रही.
  • भोजपुर जिला के सहार बाजार में मूर्ति भसान खातिर जाए का रास्ता का झगड़ा में एक दर्जन लोग घवाहिल हो गइल बा.
  • बलिया के रसड़ा इलाका में आजु मोटरसाइकिल सवार कुछ बदमाश एगो सर्राफा व्यापारी के डेरवा के 3 लाख 25 हजार रुपिया के गहना आ नगदी लूटके परा गइलन स. एगो दोसरा घटना में नगरा इलाका में एगो आदमी के गोली मार के हत्या कर दिहल गइल.
  • उप्र में अब से नेशनल हाईवे पर शराब बेचे के लाइसेन्स ना दिहल जाई. स्कूल, अस्पताल आ धार्मिक जगहन का लगे पहिलहीं से शराब दुकान के लाइसेंस पर रोक बा.
  • छठ पर्व का मौके पर बिहार जाए वालन के बेसम्हार भीड़ का चलते आजु नयी दिल्ली टीसन पर दरभंगा जाए वाली बिहार संपर्क क्रांति एक्सप्रेस में चढ़े के कोशिश करत दू जने नीचे गिर गइले. एगो के जान चल गइल जबकि दोसरका के टाँग कटा गइल आ अस्पताल में भरती करावल गइल बा.
  • सारण जिले के पानापुर थाना के बसहिया गांव में छह साल के एगो बच्ची से बलात्कार कइला का बाद ओकर हत्या कर दिहल गइल. आजु शनिचर का दिने ओकर लाश खेत में मिलला का बाद नाराज गाँव वाले पुलिस के जीप में आग लगा दिहले.
  • गोण्डा के वजीरगंज में जिला पंचायत के सदस्य रह चुकल एक आदमी के आजु गोली मारके मुआ दिहल गइल. पुलिस के कहना बा कि ई हत्या रंजिश का चलते भइल लागत बा. अनजान लोग का खिलाफ मुकदमा लिख लिहल गइल बा.