जमीन से जुड़ल झगड़ा का चलते अवतार नगर थाना क्षेत्र के कोठियां नरांव पंचायत के मदनपुर गांव के रहेवाला पैंतीस बरीस के अरविन्द कुमार के बुध का सबेरे नयागाँव टीसन पर गोली से भूंज के मार दीहले सँ बदमाश.
नया गाँव के रसुलपुर के हाई स्कूल में पढ़ावेवाला अरविन्द जब नयागाँव टीसन पर इंटरसिटी से उतरलें त पहिलहीं से प्लान बना के आइल तीन गो हत्यारा उनुका पर गोली के बरखा क दिहलें आ उनकर ओहिजे मौत हो गइल. फायरिंग के आवाज सुन के लोग में भगदड़ मच गइल आ लोग जेने तेने भागे निकलल. एही आपाधापी मे तीनो हत्यारा आपन काम पूरा क के आराम से अपना मोटरसाइकिल से भाग निकललें.
एह हत्याकांड से खिसियाइल लोग मेन रोड जाम क दिहल जवना के बहुत मुश्किल से साँझ बेरा हटवावल जा सकल.
316 total views, 5 views today