इलाहाबाद में बोलावल राष्ट्रीय स्वंयसेवक संघ के संगठन विद्या भारती के शिविर के संबोधित करत यूपी के मुख्यमंत्री योगी आदित्यनाथ जी कहनी कि यूपी के सगरी साठो हजार ग्रामपंचायतन में औरतन के बढ़न्ती करावे वाली योजनन के लागू करावल जाई. कहनी कि लड़िका आ लड़िकी में भेदभाव परिवारे से शुरु होला आ एही से समाज में बुराई घर करेले. एकरा के खतम करे ला लड़िकियन आ ओरतन के बढ़न्ती पर जोर दीहल जरुरी बावे.
यूपी के सगरी सरकारी स्कूलन में बातली के कनेक्शन देबे पर काम शुरु हो गइल बा. सरकार वइसन सगरी स्कूलन के सूची मँगवले बिया जहाँ अबहीं बिजली के कनेक्शन नइखे.
यूपी के कासगंज में 26 जनवरी का दिने निकालल विद्यार्थी परिषद के तिरंगा यात्रा पर पाकिस्तान जिन्दाबाद बोलत हमला भइला का बाद चन्दन गुप्ता के गोली लगला से मौत हो गइल. एकरा बाद बिगड़ल हालात पर प्रशासन अब काबू पा लिहले बावे. गोली चलावे वाला बदमाश राशिद का घर से कई गो देशी बम बरामद भइल बा बाकिर ऊ कहीं भाग के जा लुकाइल बा. ओकर तलाश कइल जा रहल बा. एह बीच कई दर्जन बवालियन के गिरफ्तारो कइल गइल बा.
जदयू के प्रदेश कार्यकारिणी के बइठक आजु पटना में नीतीश कुमार का अध्यक्षता में भइल जवना का बाद प्रदेश अध्यक्ष वशिष्ठ नारायण सिंह कहलें कि राज्य में अबहीं चुनाव करावे के कवनो विचार नइखे. लोग पाँच बरीस ला नीतीश कुमार के मुख्यमंत्री बनवले राखे ला भोट दिहले रहलें आ एहमें कवनो बदलाव नइखे आइल.
भोजपुरी गायक भरत शर्मा के फर्जीवाड़ा करे का आरोप में शनीचर का दिने धनबाद के एगो अदालत से दू बरीस जेल आ दस हजार रुपिया जुर्माना के सजा सुनावल गइल. भरत शर्मा पर टीडीएस के गलत भुगतान लेबे के मामिला में ई सजा सुनावल गइल बा. बाद में भरत शर्मा के जमानत पर रिहो कर दीहल गइल. अब ऊ आगे उपर के अदालत में अपील करीहें.
86 total views, 2 views today