हार देखत ईवीएम जाप शुरू कइलसि त्रिपुरा में माकपा


अगरतला 21 फरवरी (वार्ता) मार्क्सवादी कम्युनिस्ट पार्टी चुनाव आयोग से शिकायत करत कहले बिया कि त्रिपुरा में 18 फरवरी के भइल विधानसभा चुनाव का दौरान ईवीएम में बार-बार खराबी आवे के जांच करावल जाय. माकपा गोल के कहना बा कि 13 गो विधानसभा इलाकन में पीवीपैट पर्ची आ ईवीएम में दर्ज मतदाता संख्या के ध्यान में राखत एकर जांच करावल जाय.

एही सिलसिला में पुरनिया माकपा नेता नीलोत्पल बसु काल्हु नयी दिल्ली में मुख्य चुनाव आयुक्त ओम प्रकाश रावत से मुलाकात कइलन आ चुनाव आयोग से कहलन कि मुख्यमंत्री के विधानसभा क्षेत्र धानपुर आ भाजपा प्रदेश अध्यक्ष बिप्लव कुमार देव के विधानसभा क्षेत्र बलरामपुर में सबले बेसी गड़बड़ी के शिकायत रहल. अइसने गड़बड़ी सिमना, पानीसागर, धर्मानागर, तकारजला, राधाकिशोरपुर, माताबाड़ी, बागमा, आशाराम्बड़ी, मोहनपुर, मंदियाबाजार, अउर सूर्यामानिनगर विधानसभा क्षेत्रो से सुने के मिलल बा.

उनुका ज्ञापन में इहो आरोप लगावल गइल बा कि कुछ ईसीएल अभियंता राजनीतिक गोलन के प्रतिनिधियन का गेरमौजूदगी में चुनाव से एक दिन पहिले राते में ईवीएम खोल दिहलें. पानीसागर विधानसभा क्षेत्र के सगरी ईवीएम, धर्मनगर के 12 गो आ जुब्राजनगर के तीन गो ईवीएम खोल दीहल गइल रहुवे. एहसे संदेह होखत बा. काहें कि पूरा तरह से तइयार ईवीएम खोले के अधिकार केकरो ना होखे. पता ना मशीन खोलि के ई अभियंता मशीनन में का का कइले होखीहें.