दस गो सीट, एगारह परचा : चुनाव मजेदार भइल

लखनऊ 12 मार्च (वार्ता). यूपी से राज्यसभा के दसे गो सीट खाली बा आ ओही पर एगारह जने के परचा आजु आखिरी दिने दाखिल हो गइल. अगर सगरी परचा सही निकलल आ केहु आपन परचा वापिस ना लीहल त चुनाव जरुरी हो जाई.

यूपी विधानसभा के गणित का हिसाब से चुनाव जीते ला 37 गो भोट चाहीं आ भाजपा का लगे ओकर आठो उमीदवार जीतवा लिहला का बादो 29 गो भोट बाचल रही आ एही 29 गो का भरोसे एगो निर्दलीय अनिल अग्रवाल आपन परचा दाखिल कइले बाड़न.

सपा गोल का लगे के भोट से ऊ महज एगो सीट पर जीत सकेले आ ओकरा बाद ओकर दस गो भोट बाचल रहि जाई,. अगर कांग्रेस, रालोद आ बसपा के भोट एकजुट रहे त विपक्ष आपन एगो उमीदवार अउरी जीता सकेला आ एही भरोसे बसपा भीमराव अंबेडकर के मैदान में उतरले बिया.
अनिल अग्रवाल के परचा दाखिल करे ला भाजपा विधायकन के साथ मिलल बा.

एह चुनाव में नियम बा कि विधायक अपना गोल के चाबुकमास्टर (ह्वीप) के देखा के आपन भोट देलें एहसे जे अपना गोल से छटकि के भोट दी ओकर विधायकियो जा सकेला.

आजि परचा दाखिल करे वालन में केन्द्रीय वित्त मंत्री अरूण जेटली, अशोक वाजपेयी, सकलदीप राजभर, कांता कर्दम, विजय पाल सिंह तोमर, डा अनिल जैन, जीवीएल नरसिंहाराव, अउर हरनाथ सिंह यादव भाजपा का ओर से आपन परचा दाखिल कइले. सपा गोल का तरफ से जया बच्चन आ बसपा गोल का तरफ से भीमराव आपन आपन परचा पहिलहीं दाखिल कर चुकल रहलें.