भोजपुरी पट्टी से 14 गो खबर, 21 मार्च 2018, बुधवार


सोनभद्र में ट्रक के धक्का से एक आदमी के मौत
सोनभद्र, 21 मार्च (वार्ता) चोपन इलाका में कोटा ग्राम पंचायत के रानीताली के ओम प्रकाश (40) बुध का साँझ वाराणसी-शक्तिनगर सड़क पार करत रहलें जह डाला का ओर से आवत एगो ट्रक उनुका के धक्का मार दिहलसि आ ऊ गिर के ओकरा चक्का का नीचे आ गइलें. उनुकर मौत ठाँवे पर हो गइल.


झारखंड में मगही, भोजपुरी, मैथिली आ अंगिका के दुसरका राजभाषा के दरजा मिलल
रांची 21 मार्च (वार्ता) झारखंड सरकार बुध का दिने मगही, भोजपुरी, मैथिली आ अंगिका के राज्य के दुसरकी राजभाषा के रूप में मान्यता देबे के फैसला कइले बिया. कैबिनेट का बइठक में एकर निर्णय लीहल गइल. जाने जोग इहो बा कि झारखंच में 12 गो अउरी भाषावन के पहिलहीं से दुसरकी राजभाषा के मान्यता दीहल जा चुकल बा. एह तरह अब 16 गो भाषा के झारखंड में दुसरकी राजभाषा के दर्जा मिल गइल बा.


योगी के पुतला फूंके वाला शिक्षकन पर मुकदमा दर्ज
देवरिया, 21 मार्च (वार्ता) देवरिया में बुध का दिने राजकीय इण्टर कालेज परिसर में वित्तविहीन शिक्षक मुख्यमंत्री योगी आदित्यनाथ के पुतला फूंकले आ एह आरोप में पांच गो नामजद समेत तीस से बेसी शिक्षकन पर मुकदमा दर्ज कइल गइल बा.


छात्रा आ बुजुर्ग के लाश गंगा में मिलल
वाराणसी, 21 मार्च(वार्ता) वाराणसी के लंका इलाका में बुध का दिने 12वीं के एगो छात्रा आ एगो बुजुर्ग के लाश गंगा में मिलल. छात्रा के पहचान मिर्जापुर के जमालपुर के रहे वाली वर्षा का रुप में भइल बा बाकिर बुजुर्ग के लाश के शिनाख्त नइखे हो पावल. दुनु शायद विश्वसुंदरी पुल से गंगा नदी में छलांग लगाके जान दिहले बाड़े.


कुशीनगर में अवैध शराब का साथे तस्कर गिरफ्तार
कुशीनगर, 21 मार्च (वार्ता) कुशीनगर में तरयासुजान इलाका के सलेमगढ़ का लगे टोल प्लाजा राष्ट्रीय मार्ग-28 पर चेकिंग का दौरान एगो कार चालक गोपालगंज बिहार के शाजिद इकबाल के पुलिस गिरफ्तार क लिहलसि जब ओकरा कार से 16 पेटी मिलावटी अंग्रेजी शराब बरामद कइल गइल. ई शराब बिहार में बेचे ला ले जात रहुवे ऊ.


वाराणसी हवाई अड्डा पर विदेशी युवक का लगे से मिलल सैटेलाइट फोन
वाराणसी, 21 मार्च (वार्ता) वाराणसी में बाबतपुर के लाल बहादुर शास्त्री अंतरराष्ट्रीय हवाई अड्डा पर बुध का दिने एगो विदेशी युवक का लगे से सैटेलाइट फोन बरामद भइला का बाद ओकरा के हिरासत में ले लीहल गइल बा.


गाजीपुर में पेड़ पर लटकल लाश बरामद
गाजीपुर, 21 मार्च (वार्ता). करीमुद्दीनपुर इलाका में बुध का दिने बस्ती में रहे वाला अजय राजभर के लाश एगो गाछ पर लटकत मिलल. ओकर पहचान ओकर भाई कइलसि आ बतवलसि कि मौसी किहां जाए के कहि के ऊ घर से चलल रहुवे आ ओकरा बाद के कुछ मालूम नइखे.


दू गो अनेरिया नाबालिग एगो किशोरी से बलात्कार कइले
गाजीपुर, 21 मार्च (वार्ता) मरदह इलाका के तोड़री गाँव में एगो नाबालिग किशोरी का साथे दू गो नाबालिग लड़िकन के बलात्कार करे के मामिला सामने आइल बा. ऊ किशोरी बतावत बिया कि जब दिशा मैदान ला ऊ मंगल के साँझ गांव का बहरी गेहूं के खेत गइल तब ओकरे गाँव के दू गो लड़िका ओकरा साथे कुकर्म कइले. पुलिस मामिला दर्ज क के ओकनी के जोहत बिया.


मऊ में बस से उतार के एगो औरत से सामूहिक बलात्कार
मऊ, 21 मार्च (वार्ता) मऊ के मधुबन इलाका में घरे आवत एगो औरत से ओह बस के कर्मचारी सामूहिक बलात्कार कइले. बतावल जात बा कि ऊ वाराणसी से निजी बस में घरे आवे ला सवार भइल. बस जब गजियापुर चहुँपल त बस चालक समेत चार लोग ओकरा के घरे पहुंचावे के झाँसा देके अपना साथे ले जा के राति में बलात्कार कइले. चारो के चिह्न लीहल गइल बा आ ओकनी के गिरफ्तार करे के कोशिश करत बिया पुलिस.


नहर से दू गे नाबालिगन के लाश बरामद
मोतिहारी 21 मार्च (वार्ता) पूर्वी चंपारण जिला के कोटवा इलाका के कररिया गांव का नियरा नहर से बुध का दिने दू गो नाबालिगन के लाश पुलिस बरामद कइलसि. एकनी के पहचान नइखे हो पावल.


बलिया में ट्रक के टक्कर से एक जने के मौत, दू जने घायल
बलिया 21 मार्च (वार्ता) बलिया के बांसडीह कोतवाली इलाका में बुध का दिने भइल ट्रक आ मोटरसाइकिल के टक्कर में मैरीटार गांव के अविनाश बिंद (19) के मौत हो गइल आ गोविंद बिंद आ धर्मेंद्र घवाहिल हो गइलें.


थरवई में ट्रेन का चपेट में आके बुजुर्ग के मौत
इलाहाबाद, 21 मार्च (वार्ता) इलाहाबाद के थरवई इलाका में सरायचंडी रेलवे फाटक का लगे रेलवे ट्रैक पर बुध का सबेरे एगो आदमी के लाश मिलल. बाद में पता चलल कि ऊ बसमहुआ गांव के 65 बरीस उमिर के केवला प्रसाद पाण्डेय रहलें. शायद रेल लाइन पार करत घरी ऊ कवनो ट्रेन से कटा गइल होखीहे.


सिद्धार्थनगर में इंडोनेशियाई सुपारी बरामद
सिद्धार्थ नगर, 21 मार्च (वार्ता) नेपाल से लागल अंतर्राष्ट्रीय सीमा पर बगाही गांव का नियरा से सशस्त्र सीमा बल तस्करी क के ले आवल जात इंडोनेशियाई सुपारी बरामद कइलसि बाकिर वाहन चालक फरार हो गइल.


इलाहाबाद में सेल्स प्रबंधक से करीब तीन लाख लूटल गइल
इलाहाबाद 21 मार्च (वार्ता) इलाहाबाद के मऊ आईमा इलाका में मोटरसाइकिल सवार चार गो बदमाश वीडियो कॉन कंपनी के सेल्स प्रबंधक देवेन्द्र कुमार त्रिपाठी से मंगल का राति करीब आठ बजे गदाईपुर रेलवे क्रासिंग का लगे दू लाख 82 हजार रुपिया लूटके फरार हो गइले. पुलिस लुटेरन के खोटे में लागल बिया.