web analytics

सुशील आ राहुल स्वर्ण पदक जीतलें, बबीता के मिलल रजत


गोल्ड कोस्ट, 12 अप्रैल (वार्ता). 21वां राष्ट्रमंडल खेलन के कुश्ती प्रतियोगिता में बियफे का दिने भारत आपन धमाकेदार शुरूआत कइलसि आ स्टार पहलवान सुशील कुमार (74 किग्रा) अउर राहुल अवारे (57किग्रा) देश के स्वर्ण पदक दिअवलें जबकि बबीता कुमारी फोगाट (53 किग्रा) रजत पदक आ किरण (76किग्रा) कांस्य पदक जीतली.
सुशील अउर राहुल के स्वर्ण पदकन के मिला के गोल्ड कोस्ट में भारत के अब 14 गो स्वर्ण पदक हो गइल बा आ ऊ पदक तालिका में तीसरा स्थान पर बरियार हो गइल बा. पिछला बेर के ग्लास्गो राष्ट्रमंडल खेलन में मिलल कुल 15 गो स्वर्ण पदकन से अब ऊ बस एके पदक पीछे बा आ कई गो मौका बाकी बा.
सुशील फाइनल में दक्षिण अफ्रीका के बोथा जोहानेस के महज 80 सेकंड में 10-0 से हरा के राष्ट्रमंडल खेलन में आपन स्वर्णिम हैट्रिक पूरा कर लिहलें. एहसे पहिले सुशील 2010 दिल्ली राष्ट्रमंडल खेलन के 66 फ्री स्टाइल वर्ग में आ 2014 ग्लास्गो राष्ट्रमंडल खेलन के 74 किग्रा वर्ग में स्वर्ण पदक जीतले रहलें.
लगातार दू बेर ओलंपिक के पदक विजेता सुशील फाइनल मैच में मैट पर आवते बोथा का खिलाफ 6-0 के शुरूआती बढ़त बना लिहलें आ फेर उनुका के पूरा तरह काबू करत आपन स्कोर पहिले 8-0 आ फेरु 10-0 क लिहलें आ बिना पसीना बहवले 80 सेकंड में स्वर्ण पदक भारत का झोरा में डाल दिहलें. सुशील अजना तेजी से मुकाबला खतम कइलें कि देखहूँ वाले ठकुआ के रह गइलें.

 25 total views,  1 views today

%d bloggers like this: