कुख्यात पवन चौधरी के गिरफ्तारी से आरा में राहत


आरा, 19 अप्रैल. पटना आ भोजपुर में दहशत के दोसर नाम बन चुकल सीरियल किलर पवन चौधरी के उदवंतनगर इलाका के बेलाउर गाँव से मंगल का दिने पुलिस के स्पेशल टीम गिरफ्तार क लिहलसि.
पुलिस सूत्रन के कहना बा कि पवन जेल में बंद अपना आका रंजीत चौधरी का इशारा पर वारदात करत रहुवे आ ओकरे कहला पर डॉक्टरन आ व्यवसायिय से रंगदारी वसूले के काम करत रहुवे. मंगलो का दिने ऊ कवनो वारदाते करे आइल रहुवे बाकिर पुलिस के भनक मिल गइल आ ओकरा के ध लिहलसि. ओकरा लगे से दू गो पिस्तौल आ कुछ जिन्दा कारतूसो बरामद भइल.
बुध का दिने पवन के गिरफ्तारी के पुष्टि करत एसपी अवकाश कुमार ई जानकारी मीडिया के दिहलन. पूछताछ में पवन चौधरी आपन बहुते राज खोल दिहलसि. कहलसि कि ऊ रुपिया ले के केहू के काम करवावत रहुवे आ काम करवला का बाद जे रुपिया देबे में आनाकानी करत रहुवे उनुकर कामो तमाम कर देत रहुवे.
पवन चौधरी का खिलाफ नाहियो त डेढ़ दर्जन मुकदमा पटना आ भोजपुर जिलन में दर्ज बा. ओकरा कुछ सफेदपौशन के संरक्षण मिलत रहुवे जवना चलते ऊ बाचल चलत रहुवे. एइसन कुछ सलोग के नाम सामने अइला का बाद अब ओहू लोग पर फेरा घूमे के अनेसा बन गइल बा.