राहुल, सोनिया इहो बतावे लोग कि कवना मामिला में जमानत पर बा लोग : मोदी

हुबली, धारवाड़ (कर्नाटक) 06 मई (वार्ता) प्रधानमंत्री नरेंद्र मोदी आजु संयुक्त प्रगतिशील गठबंधन के अध्यक्षा सोनिया गांधी आ कांग्रेस अध्यक्ष राहुल गांधी पर आरोप लगावत कहलन कि महतारी बेटा पांच हजार करोड़ रुपिया के घोटाला का मामिला में जमानत पर चलत बावे लोग. एह लोग के चाहीं कि जनता के बतावसु कि आखिर कवन बाति ला एह लोग के जमानत लेबे के पड़ल बा.
एगो बड़हन जनसभा के संबोधित करत पीएम मोदी कहलन कि सार्वजनिक जीवन के कुछ मर्यादा होले आ ओकरा के तूड़े के ना चाहीं. बाकिर ओकरा के तूड़ल जा रहल बा आ जो तूड़त बा ओकरा एकर कीमत चुकावहीं के पड़ी. दोसरा पर अछरंग लगावे से पहिले अपना ओर झाँके के चाहीं आ देश के बतावे के चाहीं कि एह लोग के कवना मामिला में जमानत मिलील बा आ कवना कारण एह लोग का खिलाफ केस लिखाइल बा.
कांग्रेस पर जनता के पइसा लूटे के आरोप लगावत भाजपा नेता आ पीएम मोदी कहलन कि कमीशन खोरी का चलते विकास के काम ना हो पावे. कहलन कि अटल बिहारी वाजपेयी सरकार में बनल हुबली अंकोला रोड के योजना एह लोग का चलते अबहीं ले लटकल बा. धारवाड़ सहित कर्नाटक के सात गो शहरन के स्मार्ट सिटी बनावे ला 14 हजार करोड़ के योजना में से सिद्दारामैया सरकार के आठ सौ करोड़ दीहल जा चुकल बा बाकिर ई लोग अबहीं ले महज 12 करोड़ रुपिया खरचले बा.
आजु सोनिया के दलित विरोधी आचरण के बात उजागर करत पीएम मोदी कहलन कि अपना दलित विरोधी रुझान का चलते आजु ले सोनिया गाँधी राष्ट्रपति रामनाथ कोविन्द से शिष्टाचारो मुलाकात करे नइखी गइत जबकि साल भर हो गइल जब दलित नेता के राष्ट्रपति चुनल गइल.