काल्हु सुरक्षा परिषद में आइल मसूद अजहर के आतंकी करार देबे वाला प्रस्ताव पर चीन अडंगा डाल दिहलसि. एह खबर पर कांग्रेस उछाह में आ गइल आ आजु ऊ एलान क दिहलसि कि अगर ओकर सरकार बनल त ऊ भारत तेरे टुकड़े होंगे कहे वाला गिरोहन पर लागे वाला देश द्रोह के मुकदमा उठा ली आ कानूने बदल दी जवना का बाद देश के गद्दारन का खिलाफ कवनो सरकार कुछ ना कर सकी.
जेल में बन्द चारा चोर लालू के ट्वीट आ फेसबुकिया बयानबाजी पर चुनाव आयोग नजर टेढ़ कइले बावे. आयोग पता लगावत बा कि लालू जेल में रहला का बादो कइसे सोशल मीडियन पर आपन बयानबाजी जारी रखले बावे. ऊ आपन अकाउन्ट खुदही चलावत बा कि ओकरा नाम के इस्तेमाल ओकर कवनो आदमी करत बा. जाँच का बादे सोचल जाई कि ओकरा पर कवन कार्रवाई कइल जाव भा ना कइल जाव.
महागठबन्हन में भितरी दाँव पेंच जारी बा. हिन्दुस्तानी अवाम मोर्चा के जीतन राम माँझी छरियाइल बाड़न कि उनुका गोल के सीट उपेन्द्र कुशवाहा के गोल से अधिका होखे के चाहीं. एह माँग के अनुरुप फैसला ना होखत देखि माँझी दिल्ली से पटना आ गइल बाड़न. अब पटना में होखे वाला महागठबन्हन के मीटिंग में एह पर कवनो फैसला लीहल जाई.
दिल्ली में 18 मार्च से शुरु होखे जा रहल उर्दू के छठवां विश्व सम्मेलन में 15 देशन से साहित्यकारन के नेवतल गइल बा बाकिर पाकिस्तान के कवनो साहित्यकार के एह सम्मेलन में नइखे बोलावल गइल.
आतंक का खिलाफ लड़ाई में नरेन्द्र मोदी के मनमोहन सिंह से मजगर नेता बतावे वाला बयान से शीला दीक्षित मुकर गइली आ कहत बाड़ूी कि उनुका बयान के तूड़ मरोड़ के परोसल गइल बा.
काल्हु बिहार के बड़हन हिस्सा में बदरी छवले रही आ कहीं कहीं बूना बानी हो सके के अनुमान मौसम विभाग लगवले बा.
यूपी के 16 लोकसभा सीट से कांग्रेस अपना उमीदवारन के सूची जारी कइले बिया. एह सूची में मुरादाबाद से राज बब्बर, कानपुर से श्रीप्रकाश जायसवाल, सुल्तानपुर से डॉ संजय सिंह, प्रतापगढ़ से रत्ना सिंह, मिर्जापुर से ललितेश त्रिपाठी, लखीमपुर खीरी से जफरअली नकवी, संतकबीर नगर से परवेज खान, बहराइच से सावित्री फूले, सीतापुर से कैसर जहाँ के नाम शामिल बा.
भगवान कृष्ण के नगरी मथुरा में आजु से होली के शुरुआत हो गइल. श्री द्वारिकाधीश मन्दिर में आजु होली रसाया गवनई का साथे अबीर गुलाल से भक्त लोग होली खेले के शुरुआत क दीहल.
