Go to ...
RSS Feed

तातल धीकल टटका खबर, अतवार, 8 नवम्बर 2020


बिहार में महाराष्ट्र राज आवे के अनेसा बनि गइल बा. काल्हु सुदर्शन टीवी छोड़ सगरी चैनलन पर आइल एक्जिट पोल में तेजस्वी के सरकार बने के उमेद देखावल गइल बा. अगर तेजस्वी के सरकार आ गइल त बिहारो में महाराष्ट्र राज आ जाई काहे कि एहू सरकार का पिछवाड़ा में राकांपा आ शिवसेना के रणनीतिकार खड़ा मिलिहें. नॉटी फेम के संजय राउत पहिलहीं कहले रहलन कि बिहार में तेजस्वी के सरकार बनि जाए के पूरा उमेद बा.

आजु भाजपा के पुरनिया नेता लाल कृष्ण आडवाणी के जन्मदिन पर मोदी आ शाह समेत अनेके भाजपा नेता बधाई दिहले बाड़ें. आडवाणी अब 93 बरीस के हो गइलन आ भाजपा के मार्गदर्शक मंडल में शामिल कइल गइल बाड़ें.

मध्यप्रदेश के इंदौर में अतिक्रमण विरोधी कार्रवाई मे बाधा डाले के अनेसा देखत राज्य में कांग्रेसी सरकार का दौरान राज्यमंत्री के दर्जा पर रहल कम्प्यूटर बाबा का नाम से मसहूर नामदेव दास त्यागी समेत सात जने के गिरफ्तार क के जेल भेज दिआइल बा. सरकार के कहना बा कि हातोद तहसील इलाका के जमूडी हपसी गाँव में दू एकड़ सरकारी जमीन पर ऊ नाजायज क़ब्ज़ा क के रखले बाड़न.

पूरबी लद्दाख में वास्तविक नियंत्रण रेखा पर पिछला कई महीना से बनल गतिरोध शुक का दिने भइल कमांडरन के आठवाँ दौर के बातचीत का बादो खतम ना हो सकल.

अमेरिका के राष्ट्रपति चुनाव के कवनो आधिकारिक घोषणा ना भइला का बावजूद ओहिजा के लिबरल मीडिया उनुका जीत के अइसन भौकाल बना दिहले बाड़ें कि दुनिया भर के राजनेता बाइडेन आहैरिस के बधाई देबे ला मजबूर हो गइल बाड़ें. अइसने भौकाल साल 2000 मे अलगोरे के जीत ला बनावल गइल रहुवे आ बाद में उनुकर शानदार हार के परिणाम आइल रहुवे.

#BREAKING | ‘हमार जान खतरा में बा. हमार जान खतरा में बा. हमरा के अपना वकीलन से बात करे नइखे दियात. आजु सबेरे हमरा के पीटल गइल. #LIVE #IndiaWithArnab https://t.co/rGQJsiKgt2 pic.twitter.com/QfzvWON5WU— Republic (@republic) November 8, 2020

न्यायालय, बाकी मीडिया, भाजपा, आ केन्द्र सरकार चुप्पी सधले बाड़ें. आजु जब कपिल मिश्रा आ तेजिन्दर सिंह बग्गा अर्णव के गिरफ्तारी का खिलाफ सत्याग्रह करे राजघाट चहुँपले त दिल्ली पुलिस ओह लोग के गिरफ्तार कर लिहलसि. जबकि दिल्ली पुलिस केन्द्र सरकार के अधीन होले.

Tags: , , , , , , , , ,

More Stories From चुनाव

%d bloggers like this: