Go to ...
RSS Feed

योगी का जन्मदिन पर विघ्न संतोषियन के एजेन्डा


टटका खबर, अतवार, जेठ अन्हरिया एकादशी, 2078 विक्रमी

गोरक्षपीठाधीश्वर आ उत्तर प्रदेश के मुख्यमंत्री योगी आदित्यनाथ के काल्हु शनीचर के जन्मदिन रहुवे आ विघ्नसंतोषी एहू दिने अपना एजेन्डा पर लागल रहलें. एने कई दिन से तरह तरह के अफवाह पसारत हवा बनावे के कोशिश हो रहल बा कि केहू तरह यूपी से योगी के विदाई करा दीहल जाय. काल्हु सोशल मीडिया के गुलजार कइल गइल कि योगी के जनमदिन पर पीएम आ भाजपा के कवनो बडका नेता योगी के जन्मदिन के बधाई ना दिहलें आ एहसे लागत बा कि अब उनुकर गिनल चुनल दिन रह गइल बा मुख्यमंत्री के पद पर. हालांकि सचाई ई बा कि राष्ट्रपति रामनाथ कोविंद, उपराष्ट्रपति वेंकैया नायडू, प्रधानमंत्री नरेन्द्र मोदी, गृहमंत्री अमित शाह, भाजपा अध्यक्ष जे पी नड्डा, रक्षा मंत्री राजनाथ सिंह समेत भाजपा के सगरी नेता योगी के बधाई दिहलें आ उऩुका स्वस्थ जीवन के कामना कइलें. बड़का लोग फोन कर के त बहुते लोग ट्वीट क के आपन बधाई दीहल.

शुक का दिने एगो बइठक में समीक्षा करत उत्तर प्रदेश के मुख्यमंत्री योगी आदित्यनाथ कहनी कि पूर्वांचल एक्सप्रेसवे के अगस्त तक ले आ बुंदेलखंड एक्सप्रेसवे के नवम्बर ले पूरा बना लीहल जाय, साथही गोरखपुर लिंक एक्सप्रेसवे के कामो तय समय में करा लीहल जाव. गंगा एक्सप्रेसवे खातिर भूमि अधिग्रहण करा के सितम्बर-अक्टूबर ले एकर शिलान्यास करवाके बनावल शुरु करे के निर्देशो दिहनी गोरक्षपीठाधीश्वर महन्तजी.

भोजपुर जिला के गड़हनी इलाका के धोबहा खरैचा गाँव का नियरा शनीचर का दिने भइल सड़क हादसा में चरपोखरी इलाका के बिहारी गाँव के एगो नवही के मौत हो गइल बा आ बाइक पर साथे बइय़ल दोसर नवही घवाहिल हो गइल.

जौनपुर मेडिकल कॉलेज के ओपीडी सेवा के शुरुआत काल्हु से हो गइल जब ई एन टी सर्जन डॉक्टर संजीव पटेल जिला चिकित्सालय में मरीजन के देखलें आ चिकित्सा सलाह दिहलें. कॉलेज में पढ़ाई के काम अगिल सत्र के दाखिला का साथ अगस्त ले शुरु हो जाए के उमीद बा.

रोहतास जिला के डेहरी इलाका के सुअरा हवाई अड्डा का लगे से चार गो अपराधियन के असलहा का साथे गिरफ्तार कर लिहलसि पुलिस. मुखबिर से सूचना मिलला का बाद पुलिस बतावल जगहा छापा मार के एहनी के गिरफ्तार कइलसि.

सारण जिला के बनियापुर इलाका में सोहई साजपुर गाँन के एगो बूढ़ के मौत इनार में गिरला का चलते हो गइल. रात में पेशाब करे निकलल रहलें आ अन्हरिया में साफ ना लउकला का चलते इनार में गिर गइलें.

छपरा-सिवान रेलखंड के दाउदपुर टीसन का लगे रेलवे क्रासिंग पर बेलदारी गांव के एगो 40 बरीस के मेहरारू के मौत कवनो ट्रेन से कटा के हो गइल.

जौनपुर जिला जेल में शुक का दिने भइल एगो कैदी के मौत का बाद बाकी कैदियन के बवाल से सचेत प्रशासन कैदियन से बातचीत का बाद मामला के जाँच करे खातिर एगो मजिस्ट्रेट टीम बना दिहलसि. सात सदस्यन के ई टीम आपन काम शुरु कर दिहले बिया.

Tags: , , , , , ,

More Stories From उत्तर प्रदेश

%d bloggers like this: